الطاحونة الثالثة اعدادي 2025-2026
اللغة العربية النص المسترسل : الطاحونة المستوى الثالثة اعدادي الاساسي في اللغه العربية
هاد النص لي سميتو "الطاحونة" مأخوذ من رواية معروفة سميتها "المعلم علي" . الكاتب ديالها هو الأديب والمؤرخ والصحفي المغربي عبد الكريم غلاب، لي تزاد فمدينة فاس سنة 1920 . النص كيتصنف كنص سردي فالمجال الاجتماعي والاقتصادي، وكيعكس المعاناة ديال الناس لي عايشين الظلم والفقر .
القصة ديال النص
القصة كدور على علي، واحد الولد خدام فواحد الطاحونة، لي تجرى عليه (تطرد) من الخدمة من بعدما هرب من عند المعلم ديالو "التدلاوي" حيت كان خدام بزاف حتى عيا وارهق . القصة بدات فاش علي رجع لدارهم بكري على غير عادتو، وهادشي خلى مّو "فاطمة" تقلق وتسولو على السبب .
شوية من بعد، سمعو الدقان بالجهد فالباب، وكان هو المعلم التدلاوي لي جا كيغوت وكيقلب على علي . علي تخبّى فواحد القنت ديال الدار ومبغاش يخرج يواجهو . فاش خرجات الأم باش تشوف شكون، لقات التدلاوي معصب بزاف و كيتهم ولدها علي باللي كلى ليه فطورو لي هو عبارة على زلافة ديال الفول وخبيزة وهرب لدارهم .
ملي حاولت الأم تهدنو، زاد فيه المعلم واتهمها حتى هي بالتواطؤ مع ولدها باش "يسرقو" ليه الفطور . هادشي خلى فاطمة تعصب و تسد عليه الباب فوجهو . فاللخر ديال هاد الأحداث، فاطمة ولات حزينة ومهمومة وكتفكر فالمستقبل ديال ولدها من بعدما المعلم التدلاوي حلف ما يرجع علي للطاحونة .
الشخصيات الأساسية
- علي: هو شخصية رئيسية، خدام بسيط فالطاحونة، كيعاني من الفقر والضغط الاجتماعي. كان خايف من مّو ومن المعلم ديالو، وفيه الجوع. كيبان متردد فمواجهة المشاكل ديالو.
- فاطمة: هي الأم ديال علي، أرملة ومسؤولة على ولادها اليتامى . واخا كانت حزينة ومقهورة، كانت كتحاول تحمي ولدها من الظروف القاصحة .
- المعلم التدلاوي: هو مول الطاحونة، كيبان كشخصية غضبانة، دغيا كيتعصب، وحاقد وكيتهم الناس بالباطل . هو كيمثل صورة ديال الاستغلال والظلم الاجتماعي .
العبرة والرسالة من النص
الكاتب استعمل أساليب بحال السرد، والوصف الدقيق للشخصيات بحال الوصف ديال وجه التدلاوي المعصب، والحوار باش يوصل لينا المشاعر ديال الشخصيات والتوتر لي كانو عايشين فيه .
النص فيه بزاف ديال القيم الاجتماعية والاقتصادية. هو كيهضر على ضرورة مساعدة الأسر الفقيرة، وحماية الأطفال من الاستغلال فالخدمة ومحاربة ظاهرة تشغيل الأطفال . كيبين لينا النص كذلك كيفاش الفقر والظروف الاقتصادية الصعيبة كيأثرو بشكل خايب على العلاقات الاجتماعية والعائلية، وكيخليو الناس يضطرو يقبلو الظلم بعض المرات .
باختصار، هاد النص هو شهادة أدبية على أهمية العدالة الاجتماعية وضرورة تحسين ظروف العيش ديال الطبقات المهمشة فالمجتمع.